தோட்ட உபகரணங்கள்

விதைகள் எப்படியோ அப்படித்தான் தோட்ட உபகரணங்களும் நமக்கு. விவசாய கண்காட்சிகளில் நம்மை விட்டால் ஏதாவது வாங்கியே ஆக வேண்டும். இல்லாவிட்டால் அன்றைய விசிட் ஏதோ குறையோடு முடிந்தது போலவே தோன்றும். அதிலும் புதிதாய் தோட்டம் ஆரம்பிக்கும் போது சொல்லவே வேண்டாம். கிடைக்கும் அத்தனையையும் வாங்கினால் தான் திருப்தி (பிறகு அதில் பாதி பரணில் தூங்கிக் கொண்டிருக்கும் 🙂 ). நண்பர் சுரேஷ் தோட்ட உபகரணங்கள் பற்றி ஒரு பதிவு எழுத முடியுமா என்று கேட்டிருந்தார். எனது பயன்பாட்டில் தெரிந்த தகவல்களை இங்கே பகிர்ந்து கொள்கிறேன்.

 Hand Sprayer

தோட்டம் என்றவுடன் முதலில் வருவது ஸ்ப்ரேயர்கள் தான். பஞ்சகாவ்யா, வேப்பம்புண்ணாக்கு கரைசல், மீன் அமிலம் என்று சகலமும் தெளிக்க உருப்படியாக ஒரு ஸ்ப்ரேயர் அவசியம். ஒரு லிட்டர், இரண்டு லிட்டர் அளவில் கிடைக்கும் சிறிய ஸ்ப்ரேயர்கள் சிறிது காலத்திருக்கு அப்புறம் சரியாக வேலை செய்வதில்லை. இந்த மாதிரி ஸ்ப்ரேயர்களில் இருக்கிற Nozzle சிறியதாக, அவ்வளவு தரமாக இருப்பதில்லை. சின்ன தூசி துகள் இருந்தாலும் அடைத்து கொண்டு கொஞ்ச நாளில் வீணாய் போய் விடுகிறது. கீழே பார்க்கும் Nozzle செட் இங்கே விவசாய கண்காட்சியில் வாங்கியது. நல்ல தரமாகவும், உறுதியாகவும் இருக்கிறது. விலை ரூ.100 தான். கோக் பாட்டில், பெப்சி பாட்டில் என்று எல்லா விதமான பெட் பாட்டில்களிலும் பொருத்தி பயன்படுத்தலாம். பஞ்சகாவ்யா, மீன் அமிலம் என்று ஒவ்வொன்றுக்கும் தனி தனி பாட்டில் வைத்துக் கொள்ளலாம். ஒரே ஸ்ப்ரேயரை வைத்தே எல்லாவற்றுக்கும் பயன்படுத்திக் கொள்ளலாம்.

 

நான் முன்பு ஒருமுறை பவர் ஸ்ப்ரேயர் பற்றி எழுதி இருக்கிறேன். நமது தோட்டம் ஓரளவுக்கு பெரிதாக இருந்தால், பவர் ஸ்ப்ரேயர் பயன்படுத்தினால் நமக்கு நிறைய நேரம் மிச்சமாகும். விலை ரூ. 2000-ல் இருந்தே கிடைக்கிறது.

Small Hand Fork & Small Trowel

மாடித் தோட்டத்தில் செடிகளை வைத்த பிறகு உரம் இடவோ, வளர்ப்பு பைகளில் ஏதும் கலந்து ஊற்ற கிளறி விட இந்த Small Hand Fork மிக பயனுள்ளதாக இருக்கிறது. வளர்ப்பு பைகளில் செடிகள் பெரிதாக வளர்ந்த பிறகு பெரிய Hand Fork வைத்து கிளறி விட முடியாது. அந்த சமயத்தில் இந்த சிறிய Hand Fork பயன்படும். இதுவும் இங்கே ஒரு கண்காட்சியில் வாங்கியது தான்.

 

Hand Trowel & Hand Fork

மாடித் தோட்டத்தில் ஒரு சீசன் அறுவடை முடிந்த பிறகு வைத்த செடிகளை எடுத்துவிட்டு அடுத்த சீசனுக்கான செடிகளை வைத்து விட இந்த Hand Fork தேவைப்படும். வளர்ப்பு பைகளில் ஊடகத்தை நன்கு கிளறி விட பயன்படும். தரையில் பாத்திகளில் கொத்தி கிளறி விட, சின்னதாய் ஏதும் தோண்ட இது உபயோகமாய் இருக்கும். இது விலை குறைவாக பிளாஸ்டிக் கைப்பிடி வைத்தும் வரும், கொஞ்சம் விலை அதிகமாக ரப்பர் கைப்பிடி வைத்தும் வருகிறது. வாங்கும் போது நல்ல தரமானதாக வாங்கினால் பயன்படுத்தவும் எளிதாக இருக்கும், நீண்டகாலம் உழைக்கவும் செய்யும்.

 

Pruners

தோட்டத்திற்கு மிக அவசியமான ஒரு உபகரணம். செடிகளில் இருந்து காய்கறிகள் அறுவடை செய்ய சிறிய ஒரு Pruner வைத்துக் கொள்ளலாம். இல்லையென்றால் பெரிய கத்தரிக்கோல் ஓன்று வைத்துக் கொள்ளலாம். கைகளால் பறிக்கிறேன் என்று கொடுமைக்கு செடியை ஆட்டி, கிளையை ஒடித்து எல்லாம் அறுவடை செய்யக் கூடாது.

Pruning செய்ய உறுதியாக இன்னொரு Pruner வேண்டும். இது கொடிகளை வெட்டி விட, செம்பருத்தி, மாதுளை, ஜாதி மல்லி போன்றவற்றின் கிளைகளை வெட்டி விட பயன்படும். பிளாஸ்டிக் கைப்பிடி இல்லாமல் முழுவதும் இரும்பில் கிடைத்தால் நீண்ட காலம் உழைக்கும். பெரிய கிளைகளை கூட எளிதாக வெட்டும்.

 

சிறிய மண்வெட்டி

சின்ன சின்ன தோட்ட வேலைகளுக்கு ரொம்பவே உதவியாக இருக்கும். நாற்று ஏதும் வைக்க சிறிய குழி பறிக்க, சின்னதாய் பாத்தி எடுக்க, களைகளை கொத்தி விட என்று தரை தோட்டத்திற்கு மிக அவசியமான ஒரு உபகரணம். மாடித் தோட்டத்திற்கு தேவை இல்லை. வாங்கும் போது முழுவதும் இரும்பில் செய்ததாய் வாங்கினால் பிடி மட்டும் நழுவி போவது போன்ற தொல்லைகள் வராது.

 

பூவாளி         

மாடித் தோட்டத்திற்கு பூவாளி தேவை இல்லை. இதை வைத்துக் கொண்டு மாடியில் நீர் ஊற்றினால் பாதி பையில் வெளியே தான் கொட்டும். தரை தோட்டத்திற்கு வேண்டும் என்றால் வாங்கிக் கொள்ளலாம். நேரடியாக விதைக்கும் பாத்திகளுக்கு தொடக்கத்தில் நீருற்ற பூவாளியை பயன்படுத்திக் கொள்ளலாம். அவ்வப்போது வைக்கும் சிறிய செடிகளுக்கு தொடக்கத்தில் கொஞ்சமாய் நீரூற்ற பூவாளி பயன்படும். மற்றபடி பெரிதாய் தேவை இல்லை. வாங்கும் போது கொஞ்சம் உறுதியான பிளாஸ்டிக்கில் வாங்கினால் பல வருடங்கள் உழைக்கும். samruddhi brand plastic மாதிரி வாங்கினால் எந்த வெயிலுக்கும் பிளாஸ்டிக் தாங்குகிறது. என்னிடம் இருக்கும் பூவாளி ஐந்து வருடங்களுக்கு முன் வாங்கியது. இன்னமும் நன்றாக இருக்கிறது.

 

இது தவிர மண்வெட்டி, கடப்பாரை என்று தேவைக்கேற்ப வாங்கிக் கொள்ளலாம்.

இளையராஜாவின் இசை

என்னடா சம்பந்தம் இல்லாமல் தோட்ட உபகரணங்களில் இசை என்று குழம்ப வேண்டாம். உழைப்பவனுக்கு இசை தானே தாலாட்டு. தோட்ட வேலை என்றால் வார நாட்களில் ஒரு மணி நேரம் போகும், வார இறுதி என்றால் மூன்றில் இருந்து சில நேரம் ஐந்து மணி நேரம் கூட தோட்ட வேலை போகும். அப்போதெல்லாம் ராஜாவின் பாடலை போட்டு விட்டால் நாள் முழுக்க கூட வேலை செய்யலாம். (“சார். ஒரு பத்து நிமிடம் டெய்லி ஸ்பென்ட் பண்ணினா போதுமா” என்று கேட்கும் கப்பல் வியாபாரிகளுக்கு நேரம் எப்படி கிடைக்கும் என்று தனி ஒரு பதிவில் பேசலாம் 🙂 ).

தோட்டத்தில் வேலை செய்யும் போது சின்னதாய் ஒரு MP3 Player with Speaker இருந்தால் அருகிலேயே வைத்து பாட்டு கேட்டுக் கொள்ளலாம். பொதுவாய் லோக்கல் எலக்ரானிக் கடைகளில் கிடைக்கும் MP3 Player அவ்வளவு நன்றாய் இருப்பதில்லை. இணையத்தில் தேடித் பார்த்ததில் Portronics Pure Sound நன்றாய் தெரிந்தது. இதில் மெமரி கார்ட், பென் டிரைவ்-ம் பயன்படுத்தலாம். விலை ரூ. 1200 இருக்கும். மொபைல் போன் பேட்டரி தான் பயன்படுத்தி இருக்கிறார்கள். ஒரு முறை சார்ஜ் செய்தால் நாள் முழுக்க பாடிக் கொண்டிருக்கும். ஒலியின் தரம் இவ்வளவு சிறிய ஸ்பீக்கர்-ல் இவ்வளவு தரமான துல்லியமான இசையை நான் கேட்டதில்லை. அருமையாக இருக்கிறது. பாட்டுக் கேட்டுக்கொண்டே வேலை செய்ய யாருக்கு பிடிக்காது. அதனால் இதையும் இந்த பட்டியலில் சேர்த்து விடுகிறேன்.

 

வேலையை மாற்றி கோவை வந்த புதிதில் முதலில் நான் மட்டும் தான் வந்தேன். படிப்பு காரணமாக கொஞ்ச நாள் குடும்பம் சென்னையில் இருந்தது. அப்போதெல்லாம் பொழுது போகவில்லை என்றால் நேரே பஸ் ஸ்டாண்ட் போய் சத்தியமங்கலம் போகும் பாட்டு ஓடிக்கொண்டிருக்கும் பஸ் ஒன்றில் ஜன்னல் ஓரம் ஒரு சீட் பிடித்து பயணம் செய்வது ரொம்ப பிடிக்கும். நேரே சத்தி போய் ஏதாவது பரோட்டா கடையில் ரெண்டு பரோட்டா சாப்பிட்டுட்டு மறுபடி அதே போல கோவைக்கு திரும்பி வந்து விடுவேன். எந்த நோக்கமும் இல்லாத ஒரு பயணம், ஜன்னல் ஓரம் முகத்தில் வீசும் காற்று, எந்த யோசனையும் இல்லாத மனம், கூடவே ராஜாவின் இசை. இன்னும் கொஞ்சம் தொடராதா என்று ஏங்க வைக்கும் பயணம். அது போல தான், தோட்டத்தில் ஏதாவது வேலை செய்து கொண்டிருந்தாலே சந்தோசம் தான். கூடவே ராஜாவின் இசையும் சேர்ந்து கொண்டால் எனக்கு அது அலுப்பில்லாத ஜன்னல் ஓர பயணம் மாதிரி தான்.