மீன் அமிலம் மற்றும் சீசன் விளைச்சல்

மீன் அமிலம்

இந்த சீசனில் முதன் முதலாய் மீன் அமிலம் முயற்சித்தேன். இதுவும் பஞ்சகாவ்யா மாதிரி ஒரு வளர்ச்சி ஊக்கி தான். பஞ்சகாவ்யா நாமே தயாரிக்க கொஞ்சம் கடினம் (நாட்டு மாட்டின் சாணம், கோமியம் என்று இங்கே நகரத்தில் எங்கே தேடுவது). நாமே தயாரிக்க கூடியது மாதிரி ஓன்று இருந்தால் நன்றாக இருக்குமே என்று தேடி கிடைத்த தகவல்களை பட்டியலிட்ட போது மீன் அமிலம் எளிதாக இருந்தது.

செய்முறை மிக எளிது தான். மீன் கடைகளில் கிடைக்கும் மீன் கழிவுகள் தேவையான அளவு (அரை கிலோ என்று வைத்துக் கொள்வோம்) வாங்கி அதன் கூட அதே அளவு (அரை கிலோ) பொடித்த நாட்டு வெல்லம் கலந்து ஒரு காற்று புகாத ஒரு பாத்திரத்தில் வைத்து நல்ல நிழலில் வைத்து விடவேண்டும் (சமையல் அறையில் பயன்படுத்தும் air tight container ஏதும் எடுத்துக் கொள்ளலாம்). வெறும் மீன் கழிவு, வெல்லம் மட்டும் தான். நீர் சேர்க்கக் கூடாது. இடையில் கலக்கி விட வேண்டிய அவசியம் இல்லை.

மூன்று வாரங்கள் (21 – 25 Days) கழித்து வெல்லமும் மீனும் கலந்து தேன் போல மாறி இருக்கும். இது செடிகளுக்கு சிறந்த வளர்ச்சி ஊக்கி. லிட்டருக்கு பத்து மி.லி அளவில் கலந்து செடிகளுக்கு தெளிக்கலாம். மீன் வாடை போய் கொஞ்சம் பழ வாடை இருக்கும் என்கிறார்கள். ஆனால் கொஞ்சம் மீன் வாடை இருக்கத் தான் செய்கிறது. மீன் அமிலத்தை ஒரு காற்றுப் போகாத பாட்டிலில் அடைத்து வைத்து ஆறு மாதங்கள் வரை பயன்படுத்தலாம் என்று சொல்கிறார்கள்.

இந்த சீசனில் பஞ்சகாவ்யா பயன்படுத்தவே இல்லை. மீன் அமிலம் தான் படுத்தினேன். அதனால் தான் விளைச்சல் கிடைத்ததா என்று முடிவு செய்ய முடியாது. விளைச்சலுக்கு பல காரணிகள் இருக்கிறது. வளர்ச்சி ஊக்கி என்பது நாம் செடிகளுக்கு ஒரு கூடுதல் பலமாக எல்லா சீசனிலும் தெளிக்கும் ஓன்று. அவ்வளவே.

இந்த சீசன் விளைச்சல்

ஜூன் ஆரம்பிக்கிறது. அடுத்த சீசனை ஆரம்பிக்க திட்டம் போய்க்கொண்டிருக்கிறது. மாடித்தோட்டம் முழுவதும் ரெடியாகி வரும் முதல் சீசன். இந்த சீசனில் இருந்து தேவைக்கு அதிகமாக இடம் இருக்கிறது. குறைந்த வகைகள் வைத்து தேவையான காய்கறிகளை கொண்ட ஒரு முழுமையான தோட்டமாய் இந்த சீசன் இருக்க வேண்டும். அங்கே அங்கே கொஞ்சம் சோதனை முயற்சிகளும் இருக்கும்.

அடுத்த சீசனுக்கு முன் போன சீசனின் விளைச்சல் பற்றி ஒரு சிறிய அலசல். இந்த சீசனின் முக்கிய விளைச்சல் வீட்டின் முன்னால் அமைத்த நிரந்தர மேட்டுப்பாத்தியில் இருந்து தான் கிடைத்தது. மாடியில் வேலை முடியவே மார்ச் ஆகிவிட்டதால் இனி தான் முழுவதும் ஆரம்பிக்க வேண்டும். மாடியில் நூல்கோல், பேபி/ஸ்வீட் கார்ன் மட்டும் வைத்து நன்றாக வந்திருந்தது.

கடந்த இரண்டு மாதங்களாய் காய்கறி விலை கன்னாபின்னாவென்று ஏறி இருக்கிறது. வெண்டை கிலோ 60, புடலை கிலோ 70,  தக்காளி கிலோ 50, கத்தரியே கிலோ ஐம்பதுக்கு போய்விட்டது. இப்படிபட்ட தருணங்களில் நமது வீட்டுத் தோட்டத்தில் இருந்து விளைச்சலை அள்ளும் போது ஒரு சந்தோசம் இருக்கத் தான் செய்கிறது.

முதன்முதலாய் கொடியில் இருந்து ஓரளவுக்கு வெற்றி கிடைத்தது. நான் தான் திட்டமிடலில் சொதப்பி சின்ன பந்தலில் இரண்டு புடலையையும் விட்டு இடம் பற்றாமல் போய்விட்டது. குட்டை புடலையும், நீண்ட புடலையும் ஓரளவுக்கு நல்ல விளைச்சலையே கொடுத்தது. குட்டை புடலை ரொம்ப குட்டையாக இருந்தாலும், நல்ல தடிமன். நல்ல எடை இருந்தது. ஒரு புடலையே 600 கிராம் வரை இருந்தது. நீட்ட புடலை சாதாரணமாய் பார்க்கும் நீட்ட புடலை அளவுக்கு ரொம்ப நீளம் இல்லை.

வெண்டையும் கொத்தவரையும் நல்ல விளைச்சலை கொடுத்தது. மொத்தமாய் இருந்த பதினைத்து வெண்டை செடியில் தினமும் கால் கிலோ தாராளமாய் கிடைத்தது.

கத்தரியிலும் விளைச்சல் அள்ளியது. வெள்ளை, ஊதா நீளம், ஊதா உருண்டை, பச்சை முள் கத்தரி என்று மொத்தம் பன்னிரண்டு செடிகள். ஒவ்வொரு முறையும் பறிக்கும் போதும் ஒரு கிலோவாவது கிடைத்தது. முதலில் கொஞ்சம் சுமாராய் இருந்த தக்காளி கொஞ்சம் சாம்பல் எல்லாம் கரைத்து ஊற்றிய பிறகு நல்ல விளைச்சல் கொடுத்தது.

கூடவே சம்மர் ஸ்பெஷலாய் மா மரமும் விளைச்சலுக்கு குறைவு வைக்கவில்லை. இந்த வருடம் தொடக்கத்தில் எக்கச்சக்க பூ பூத்து கிட்டதட்ட ஐநூறு பிஞ்சுகளாவது வந்திருக்கும். வெயிலின் தாக்கமா என்னவென்று தெரியவில்லை. என்பது சதவீதம் உதிருந்து கடைசியில் ஒரு அறுபதில் இருந்து எழுபது மாங்காய் தான் தேறியது. பழம் ஒவ்வொன்றும் குறைந்தது அரைகிலோ இருக்கும் என்பதால் ஐம்பது காய் பறித்தாலும் நமது கோடை மாம்பழம் தேவை பூர்த்தி ஆகிவிடும்.

தக்காளி, வெண்டை, கொத்தவரை, புடலை காய்த்து ஓய்ந்து விட்டது. கத்தரி மட்டும் இன்னும் ஓரிரு மாதங்களுக்கு விளைச்சல் கொடுக்கும். கரணை கிழங்கும், சிறு கிழங்கும் விளைய இன்னும் கொஞ்சம் நாட்கள் ஆகும்.

மாடியில் இருந்து நூல்கோல், முள்ளங்கி, கீரை என்று கிடைத்துக் கொண்டிருந்தது.

இந்த சீசனில் விளைச்சலுக்கு முக்கிய காரணம் நான் அமைத்த மேட்டுப்பாத்தியும் அதில் எருவும், இலைசருகும் கலந்து போட்ட ஊடகமும் தான் என்று நினைக்கிறேன்.

அதிக விளைச்சலால் முதன் முதலாய் விளைச்சளில் கிடைத்த காய்கறிகளை அக்கம் பக்கத்தில் இருப்பவர்களுக்கு விற்றோம். வீட்டுத் தோட்டத்தில் இருந்து கொடுப்பதால் நிறையவே டிமான்ட் :). காய்கறி விலையும் உச்சத்தில் இருந்ததால் விற்றதில் கிட்டதட்ட ரூ.800 கிடைத்திருக்கும். வீட்டில் சந்தையில் வெங்காயம் போன்ற இதர பொருட்களை வாங்க அதை பயன்படுத்திக் கொண்டார்கள். மொத்தத்தில் கடந்த இரண்டு மாதங்களாக காய்கறியே வாங்க அவசியம் இல்லாமல் போனதில் பெரிய வெற்றி தான்.

மாடியில் பேபி/ஸ்வீட் கார்ன்

 

சம்மர் ஸ்பெஷல்